الرئيسية
العمل/الترفيه
أولا ازيكم يااحلى ناس فى الدنيا
هو اه يمكن الموضوع ده مكانه مش هنا
بس حطيته هنا عشان اعرف بس رايكم فى قضية
يمكن صغننة شويتين
طبعا احنا عارفين وطبعا مش هنقدر ننسا اللى عملته
الجزائر فى حق مصر واد ايه حجم الغلط اللى حصلنا بسببهم
( ناس وحشين اوى ) وعشان كده قررنا كلنا كمصريين
ومسلمين جدعان اوى اننا نقاطعهم لانهم فرنساويين وخلافه
ماشى عندنا حق مينفعش يضربونا فى بلدهم ويسمموا اللاعيبة
بتاعنا مع ان اللاعيبة بتاعنا اتسممت وكانت مبسوطة بدليل
انهم مااتكلموش الا بعدها بحوالى 7 شهور ( الظاهر كانوا حاطين فى السم سكر ) صعبنا عليهم
ماشى ياسيدى
طيب مااحنا فى القاهرة ضربناهم ياخبر ابيض اه ضربناهم
وكسرنا الاتوبيس بتاعهم ودلوقتى وصلوا كاس العالم
والعلاقة اتدهورت على الاخر
طيب يعم ايه الحكاية بقا
بتسالوا اكيد ايه علاقة الكلام ده بالموضوع
هقولكم يااخوانا
الجزائر دلوقتى واقعة فى مجموعة حلوة اوى
هتلاعب انجلترا
البلد الشقيق اللى احتلت مصر 74 سنة بس وطلعوا بالعافية
غير وعد عمو بلفورد اللى بسببه اخوانا فى فلسطين
بيعانوا ومحتلين غير بقا العدوان الثلاثى علينا
وحملة فريزر اللى بسببه ربنا يعمر بيته كل مواطن مصرى دخل بيته التلاجة بسببه
ومين كمان ياسيدى
امريكا
بلد الحرية والامان والديمقراطية اه خلاص
نشجعهم بالعند فى الجزائر
ومننساش دور امريكا طبعا فى العدوان الثلاثى
لما حذرت ال 3 دول عشان هما دخلوا مصر بدون موافقتها
يعنى لو كانوا قالولها ( اه كانت هتدخل معاهم )
ده غير طبعا انهم دول اسلامية ناطقة باللغة الانجليزية
فعشان كده هنشجعهم ضد اخوانا
وما خفى من انجلترا و امريكا كان اعظم
واسالوا العراق
واخيرا
الهدف من الموضوع ده بجد
اننا فعلا لازم بجد نعرف راسنا من رجلينا
الناس اللى بتقول مش هنشجع الجزائر
حقهم
بس على الاقل مانقلش هنشجع امريكا او انجلترا
ضد فريق عربى ايا كانت الظروف وايا كان بينا ايه
مينفعش نخلط حاجة بحاجة
الخلافات اللى بينا فى يوم من الايام هتزول
انما علاقتنا بامريكا او انجلترا عمرها ما هيكون فيها تقارب
لاننا مختلفين اختلاف كلى
انما الجزائر او اى دولة عربية
فالمفروض يكون ارتباطنا بيها اكبر
مستنية رايكم
